Shqipëria që duam: Edhe Shoqata Shqiptare e Personave të Paaftë përfituese e lehtësirave të ligjit Nga Maksim Rushi*

Shqipëria që duam: Edhe Shoqata Shqiptare e Personave të Paaftë përfituese e lehtësirave të ligjit  

Nga Maksim Rushi*

Edhe Shoqata Shqiptare e Personave të Paaftë është përfituese e të gjitha lehtësirave që parashikon ligji, ashtu si gjithë shoqatat e tjera të aftësisë së kufizuar. Mbi të gjitha edhe fëmijët me aftësi të kufizuar të kësaj shoqate, do të jenë përfitues të lehtësirave në arsim. Personat e paaftë do të përfitojnë edhe nga përjashtimi i taksave të përcaktura me ligj. Përsa më sipër na u konfirmua prej platformës “Shqipëria që Duam”. Për këtë arsye, në emër të anëtarëve të shoqatës sonë u shprehim falenderimet dhe mirënjohjen tonë. 

Më konkretisht në përgjigjen e ardhur prej Zyrës së Bashkëqeverisjes në adresë të shoqatës sonë thuhet:  

“…Në lidhje me rastet e raportuara për fëmijët me aftësi të kufizuar që nuk përfitojnë nga lehtësirat në arsim si dhe rastet e personave që nuk përfitojnë nga përjashtimi nga taksat, me shkresën nr. 3319/2, datë 20.06.2018, këto raste i janë përcjellë për shqyrtim Ministrisë së Arsimit, Sportit dhe Rinisë si dhe Ministrisë së Financave dhe Ekonomisë”, që do të thotë se gjithçka është në rrugën e zgjidhjes.

Shqipëria që Duam dhe “kapot” e drejtorive rajonale

Megjithatë na duhet të sqarojmë se shoqata jonë ka qenë përfituese e lehtësirave të parashikura nga ligji që nga dita e krijimit të saj, por çuditërisht, disa drejtori rajonale në qarqe të ndryshme të vendit ofronin lehtësira për anëtarët e Shoqatës tonë, pra viheshin në zbatim të ligjit, kurse disa të tjera jo, sepse u pëlqen të qëndrojnë mbi ligjin. “Kapo” të tillë gjen vetëm në Shqipëri. Kjo gjë ndodhte me të gjitha lehtësirat që na jep ligji siç janë: Tarifa e studimit për studentët invalidë ose për fëmijët e inavlidëve; Tarifa për përdorimin e aparateve televizive e Radiotelevizionit Publik; Tarifa për pajisjen me leje drejtimi e Drejtorisë së Përgjithshme të Shërbimeve të Transportit dhe tarifa e kontrollit të automjeteve, si dhe nga taksat e tjera kombëtare të parashikuara në ligj. Ndaj shpresojmë shumë që Zyra e Bashkëqeverisjes t’u japë fund praktikave të tilla paradoksale që ndodhin nëpër rrethe. Për të mbërritur deri në finale  ne do të vijojmë të bashkëpunojmë me Shqipëria që Duam duke denoncuar shkeljet ligjore, rastet korrupsionit dhe shfaqjen e “kapove” në zyrat e shtetit.

Keqkuptimet

Të gjitha keqkuptimet e deritanishme, herë me qëllim dhe herë jo; herë nga padia dhe herë nga të sjellurit si “kapo”  kanë ardhur sepse shoqata jonë është e re, e krijuar më 4 dhjetor 2012 me vendim nr. 3457 të Gjykatës së Rrethit Gjyqësor

Tiranë, e pajisur me NIPT L44011191R; qëllimi parësor i së cilës është kujdesi për kategorinë e qytetarëve me dëmtim fizik e pluridifekt, të cilët janë persona që nuk mbulohen nga skemat e sigurimeve shoqërore, por jo vetëm, pasi kjo shoqatë përfshin edhe ata të cilët janë të mbuluar nga këto skema. 

Sot kjo shoqatë gjendet e shtrirë në të gjitha qarqet e vendit, por disa drejtorë të drejtorive të qarqeve nuk kishin dëshirën ta njihnin Shoqatën Shqiptare të Personave të Paaftë, nuk merrnin parasysh që shoqata ka një vendim gjykate, është e ligjshme dhe ka një program  sipas konventave europiane. Tipike rastesh të tilla kanë qenë Drejtoria rajonale e Shërbimeve të Transportit Korçë dhe Fier, si dhe Bashkia Kamzë, e cila nuk njeh librezën e Shoqatës Shqiptare të Personave të Paaftë, e për rrjedhojë, personat me aftësi të kufizuar nuk përfitojnë nga shërbimi i transportit urban. Urojmë që tashmë e në vijim çudira të tilla mos ndodhin më. 

Shqipëria që Duam shpjegon

Për më shumë, këtë aspekt të rëndësishëm e shpjegon edhe Shqipëria që Duam. 

Në përgjigjen e saj morëm informacion edhe përsa i përket përcaktimeve në Ligjin Nr. 93/2014 “Për përfshirjen dhe aksesueshmërinë e personave me aftësi të kufizuar”,  ku na sqarojnë se: 

“MSHMS koordinon dhe monitoron politikat për personat me aftësi të kufizuar në zbatim të Planit Kombëtar për Personat me Aftesi të Kufizuar 2016 – 2020, miratuar me VKM Nr. 483, datë 29.06.2016. Ligji Nr. 93/2014 i cili përmban një përkufizim gjithëpërfshirës për personat me aftësi të kufizuar të të gjithë kategorive; dhe Plani Kombëtar ka përcaktuar objektiva dhe indikatorë për të gjitha institucionet e përfshira”. 

Ndaj edhe anëtarët e Shoqatës Shqiptare të Personave të Paaftë, janë persona me aftësi të kufizuar, ashtu si gjithë personat e tjerë të kësaj kategorie që do të thotë se: 

"Person me aftësi të kufizuar" është individi, të cilit i është kufizuar aftësia, si pasojë e dëmtimit fizik, shqisor, të intelektit, psikike/mendor, të lindura apo të fituara gjatë jetës nga aksidente, sëmundje, të përkohshme apo të përhershme, që nuk vijnë nga shkaqe, që lidhen me punësimin, e vërtetuar kjo nga Komisioni Mjekësor i Caktimit të Aftësisë për Punë (KMCAP), përfitojnë pagesë për shkak të aftësisë së kufizuar”. 

Kundër këtij përcaktimi ligjor nuk mund të dalë askush, qofshin këta edhe “atavizma kaposh” të sistemit të kaluar.
Ndaj edhe një herë faleminderit Shqipëria që Duam!

*Maksim Rushi, kryetar kombëtar i Shoqatës Shqiptare të Personave të Paaftë